ភ្នំពេញ៖ ភរិយាសម្ដេចតេជោគឺសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងកូនប្រុសស្រីរួមទាំងកូនប្រសារទាំងអស់ និងមានចៅ២នាក់របស់សម្ដេចតេជោ បានចូលរួមអបអរសាទរការទទួលបានពានរង្វាន់ «សមិទ្ធផលពេញមួយជីវិតរបស់មេដឹកនាំឆ្នើមពិភពលោក» របស់សម្ដេចតេជោ ហ៊ុន សែន ដោយផ្ទាល់នៅព្រឹកថ្ងៃទី១៩ ខែធ្នូ ឆ្នាំ២០២២នេះ។

អ្វីដែលគួរឱ្យចាប់អារម្មណ៍នោះគឺនេះជាការបង្ហាញខ្លួនជាសាធារណៈលើកដំបូងជាមួយសម្ដេចតេជោរបស់សម្ដេចកិត្តិព្រឹទ្ធបណ្ឌិតបន្ទាប់ពីខកខានចូលរួមជាមួយសម្ដេចតេជោជាច្រើនខែកន្លងមក។

ក្នុងសម្លៀកបំពាក់ឈុតព័ណ៌ក្រហមស្រាលយ៉ាងស្រស់ស្អាត សម្ដេចកិត្តិព្រឹទ្ធបណ្ឌិត បានអមដំណើរសម្ដេចតេជោ ក្នុងការជួបជាមួយតំណាងកិច្ចប្រជុំកំពូលបច្ចេកវិទ្យានិងសេដ្ឋកិច្ចចិនសកល និងវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក (KSI) ផងដែរ។

ពានរង្វាន់សមិទ្ធផលពេញមួយជីវិតរបស់មេដឹកនាំឆ្នើម ត្រូវបានប្រគល់ជូនពីកិច្ចប្រជុំកំពូលបច្ចេកវិទ្យានិងសេដ្ឋកិច្ចចិនសកល និងវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក (KSI)។

ការសម្រេចផ្តល់ពានរង្វាន់ «សមិទ្ធផលពេញមួយជីវិតរបស់មេដឹកនាំឆ្នើម» ជូនសម្តេចតេជោនាយករដ្ឋមន្ត្រីកម្ពុជា បានធ្វើឡើងបន្ទាប់ពីវិទ្យាស្ថាន បានសិក្សា និងវាយតម្លៃយ៉ាងល្អិតល្អន់ ទៅលើលក្ខណៈសម្បត្តិនៃការដឹកនាំ និងសមិទ្ធផលទាំងឡាយ ដែលកើតចេញពីការដឹកនាំរបស់សម្តេចតេជោ ហ៊ុន សែន។ វិទ្យាស្ថាន បានកត់សម្គាល់ពីភាពប៉ិនប្រសព្វ ឈ្លាសវៃ និងពោរពេញដោយឆន្ទៈមនសិការ ភក្តីភាពយ៉ាងមុតមាំចំពោះជាតិ និងប្រជាជន ហើយបានធ្វើពលីកម្មដោយមិនចេះនឿយហត់ ដើម្បីនាំមកនូវសុខសន្តិភាព ភាពក្សេមក្សាន្ត វឌ្ឍនភាព ភាពរីកចម្រើន និងវិបុលភាពសម្រាប់ជាតិ និងប្រជាជាតិកម្ពុជា៕